ऑफिसमध्ये रहा फिट
गेली २५ वर्षं नमिता जैन या फिटनेसच्या क्षेत्रात काम करत आहेत, तसंच त्याविषयी विविध वृत्तपत्रांमधून तसंच नियतकालिकांमधून लेखनही करत आहेत. आरोग्यदायी खाणं आणि आरोग्यदायी जीवनशैली अंगीकारणं या तत्त्वावर त्यांचा भर असतो, तो त्यांनी त्यांच्या पुस्तकांमधूनही मांडलेला आहे. त्या बॉम्बे हॉस्पिटलमध्ये आरोग्यविषयक तज्ज्ञ सल्लागार असून तिथं त्या व्यायामाचे, जीवनशैली बदलण्याचे आणि वजन कमी करण्याचे सेशन्स घेतात. तसंच त्यांनी 'फेमिना मिस इंडिया २०१२'च्या स्पर्धेत आहारतज्ज्ञ म्हणून कामही केलं होतं.
अनुवाद :
डॉ. अरुण मांडे हे वैद्यकीय व्यवसायाबरोबरच भरपूर लेखनही करतात. आजवर त्यांचे विज्ञान कथासंग्रह व विज्ञान कादंबऱ्या प्रसिद्ध झाल्या आहेत. आरोग्यविषयक इंग्रजी पुस्तकांचे मराठी अनुवादही त्यांनी केले आहेत. त्याचप्रमाणे त्यांचे आरोग्यविषयक स्तंभलेखनही चालू असतं. त्यांच्या पुस्तकांना राज्य पुरस्कार, चिपळोणकर पुरस्कार असे पुरस्कार प्राप्त झाले आहेत. विज्ञानकथांसाठी महाराष्ट्र मराठी साहित्य परिषद, पुणे यांच्या ‘ग्रंथकार’ पुरस्कारानेही त्यांना सन्मानित करण्यात आलं आहे.
मीटिंग्ज… कामानिमित्त प्रवास… सतत बाहेरचं खाणं… डेडलाइन्स… आणि या सगळयामुळे येणारा मानसिक व शारीरिक ताण-तणाव!
…ऑफिस म्हटलं की, हे सर्व आलंच आणि त्यापाठोपाठ आले त्यांचे सखे-सोबती म्हणजे, मधुमेह, उच्च रक्तदाब, स्थूलपणा, हृदयविकार आणि पाठदुखी यांसारखे विकार! या सगळया समस्यांच्या मुळाशी गेल्यास, त्याचं मुख्य कारण असतं – बैठं काम, व्यायामाचा अभाव आणि असंतुलित आहार – अशी अनियमित जीवनशैली.
या पुस्तकात सुप्रसिध्द आहारतज्ज्ञ नमिता जैन यांनी कामाच्या वेळेत आणि कामाच्या जागी व्यायाम कसा करावा, हे उदाहरणांसह सांगितलं आहे. तसंच ‘फास्ट लाइफस्टाइल’मुळे उद्भवणार्‍या आरोग्यविषयक समस्यांवर मात करण्यासाठी ‘प्रॅक्टिकल’ व सहजशक्य असे उपायही समजावून सांगितले आहेत.
