हॅपी लग्न.कॉम – १
सहजीवनाची सुरुवात फुलवण्यासाठी…
विजय नागास्वामी यांनी मद्रास मेडिकल कॉलेजमधून एम.बी.बी.एस.ची पदवी संपादित केली असून मानसोपचारशास्त्रात त्यांनी पदव्युत्तर पदविका मिळवली आहे. सुरुवातीची काही वर्षं (१९८४-१९९१) त्यांनी ‘स्किझोफेनिया रिसर्च फाउंडेशन’साठी काम केलं. जागतिक आरोग्य संघटनेसारख्या आंतरराष्ट्रीय संघटनांसाठी त्यांनी सल्लागार म्हणूनही काम केलं आहे. १९९१ ते ९७च्या दरम्यान त्यांनी कॉर्पोरेट क्षेत्रात शिरकाव केला आणि चेन्नईमधील एका पब्लिक लिमिटेड कंपनीमध्ये एच.आर. विभागात काम केलं.
१९९७ पासून व्यक्ती, जोडपी आणि कॉर्पोरेटजगताशी निगडित मानसोपचारपद्धतींवर त्यांनी लक्ष केंद्रित केलं. आतापर्यंत त्यांची समुपदेशनावरची अनेक पुस्तकं प्रकाशित झाली असून त्यातील बरीच पुस्तकं ‘बेस्ट सेलर’ ठरली आहेत.
अनुवाद :
शुभदा चौकर या ‘वयम्’ या किशोरांच्या मासिकाच्या मुख्य संपादिका असून त्याआधी त्या २० वर्षं ‘लोकसत्ता’ या आघाडीच्या दैनिकात कार्यरत होत्या. सुमारे १० वर्षं त्यांनी लोकसत्ताच्या शनिवार आणि रविवार पुरवण्यांची जबाबदारी पार पाडली. याशिवाय त्या मुंबई ग्राहक पंचायतीच्या कार्यकारिणी सदस्या असून जुलै, २०१३मध्ये जिनीव्हा येथे जाऊन त्यांनी ‘युनायटेड नेशन्स’मध्ये ग्राहक हक्कांच्या गाइडलाइनमधील सुधारणांवर भारताचं प्रतिनिधित्व केलं आहे. त्यांनी दोन फेलोशिप्सअंतर्गत ‘मुंबईतील बारमध्ये काम करणाऱ्या मुलींचे प्रश्न’ आणि ‘महिलांचे प्रजनन स्वास्थ्य’ या विषयांवर संशोधनही केलं आहे.
लग्न हा आयुष्यातला एक महत्त्वाचा टप्पा मानला जात असला, तरी निकोप सहजीवनाकडे वाटचाल होणं म्हणजेच खर्‍या अर्थाने लग्न यशस्वी होणं, असा कानमंत्र क्वचितच मिळतो. आणि मग बरेच जण ‘पदरी पडलं अन् पवित्र झालं’ म्हणत लग्न रेटत तरी राहतात किंवा मागचा-पुढचा विचार न करता ‘काडीमोड’ तरी करतात.
प्रसिध्द मानसोपचारतज्ज्ञ विजय नागास्वामी यांनी या पुस्तकात लग्न यशस्वी होण्यासाठी लग्नाआधीपासूनच त्याचा पाया भक्कम कसा करावा, सहजीवन कसं ‘फुलवत’ न्यावं, हे सहजसोप्या भाषेत समजावून सांगितलं आहे. गेल्या काही वर्षांत, स्त्री-पुरुष यांचे संसारातले ‘रोल्स’ बदलल्याने नातेसंबंधांवर झालेल्या परिणामांचाही यात विचार केला आहे. पुस्तकात नागास्वामी यांनी पुढील विषय उदाहरणांसह स्पष्ट केले आहेत :
जोडीदाराची निवड
लग्नाचं बदलतं स्वरूप
व्यक्तिगत स्पेस व मॅरेज स्पेस
भावनिक व लैंगिक नात्यांचा विकास
एकमेकांच्या कुटुंबांशी असलेले नातेसंबंध
करिअर व कुटुंबाचा समतोल इत्यादी…
लग्न झालेल्या किंवा होऊ घातलेल्या अन् सुखी सहजीवनाच्या शोधात असलेल्या प्रत्येकासाठी उपयुक्त; आणि हो, भेट देण्यासाठी उत्तम!
